Gure taldeak Gipuzkoako kopan lehiatzen ari dira eta, klubaren 25. urteurrena ospatzen ari garela aprobetxatuz eta Trinitate jaiekin bat eginez, asteburu honetan Gipuzkoako kopako 4 finalerdi eta 6 final jokatuko dira Elgoibarren!
Gure taldeak larunbatean 11:30etan hasiko dira lehiatzen. Olaizaga kiroldegian Urkunde kadete mutilen taldeak Zarautz izango du aurkari finalera iristeko lehian. Beste finalerdia Hondarribiak eta Bergarak lehiatuko dute 10:00etan. Bi partiduetako irabazleek finala jokatuko dute igandean 11:00etan, Olaizagan berriz ere. Astigarraga Gys Sport taldeko kadete neskek ere finalerdiko partidua jokatuko dute, kasu honetan Zumaian, Pulporen aurka. Partidu hau larunbatean 12:30etan izango da eta, irabaziz gero, igandean Oñatin 12:00etan jokatuko dute finala.
Etxera itzuliz, Olaizagan 13:00etan, Alcorta Forging Group taldeko senior mutilek ere kopako partidua izango dute Usurbilen aurka. Partidu berezia izango da biak dagoeneko sailkatuak baitaude Ekainaren 1ean jokatuko den finalerako. Beraz, larunbatekoa finalerako entsegu bat izango dela esan daiteke. Final hori non izango den ez dakigu oraindik, baina dakiguna da egun eta toki berean izango dela Malape Tabernako senior neskak lehiatzen ari diren kopako finala. Saiatuko gara 2 finalak Elgoibarren joka daitezen, baina Malape Tabernako neskak finalean ikusi ahal izateko Leizaran gainditu beharko dute aurretik finalerdietako partiduan, larunbat honetan 16:00etan Donostiako Egia kiroldegian.
Bestalde, Deuko Izarrako jubenil neskek ere jokatu nahi dute beraien taldeko finala, baina horretarako Astigarragari irabazi beharko diote larunbatean 16:00etan Olaizagan. Ordu berean, baina IMH kiroldegian, Irauli Bosteko eta Ordizia lehiatuko dira beste finalerdian. Finala igandean izango da, 12:30etan Olaizagan.
Finalerdi hauek bukatu ondoren iritsiko da asteburuko lehenengo finala eta Salento Gelatiko gure kadete neskek izango dute titulua lortzeko aukera. Horretarako Bera Bera gainditu beharko dute Olaizagan 17:45etan. 15 minutu beranduago, 18:00etan, hasiko da bigarren finala, IMH kiroldegian. Kasu honetan Urola eta Pulpo klubetako kadete mutilak izango dira aurrez aurre.
Azkenik, igande goizean 11:00etan eta 12:30etan IMH kiroldegian kadete mutilen eta jubenil nesken finalak izango dira ikusgai. Finala nork jokatu duten larunbatean erabakiko da Zumaian eta Orion jokatuko diren finalerdietan. Partidu hauetan ez dute Sanloko taldeek lehiatuko.
